Lokaldemokratiundersøkinga, som vart lagt fram tysdag, viser at kommunane er opptekne av utvikling, men dei må kome nærare sine eigne innbyggjarar, seier kommunalminister Liv Signe Navarsete.
– Ikkje minst er det bra at politikarane har høgare ambisjonar enn innbyggjarane, seier Navarsete på nettstaden til departementet. Ifølgje undersøkinga er politikarane mindre nøgde med tenestene enn innbyggjarane.
Undersøkinga har kartlagt kva folkevalde og innbyggjarar i 50 kommunar har av røynsler med og oppfatningar av kommunane. Resultatet viser at innbyggjarane er nøgde med tenestene sine og tykkjer kommunane er effektive. Men dei vil vite meir om kva skattepengane blir brukt til. Innbyggjarane vil også bli høyrde i større grad.
– Det er ingen tvil om at kommunane kan kome nærare borgarane og la dei ta større del i avgjerdene. Kommunane må få meir informasjon tilgjengeleg, til dømes gjennom sosiale medium. Det er også viktig at innbyggjarane kan påverke meir direkte, for eksempel gjennom ungdomsråd. Fleire kommunar har hatt suksess med det, seier Navarsete. (©NPK)
