Det er brei semje om at overføring av meir spesialiserte helseoppgåver til kommunane vil bli ei vanskeleg oppgåve med den kommunestrukturen vi har i dag.
Spørsmålet er om heile kommunestrukturen må endrast, eller om auka satsing på samarbeid vil vere nok for at dei minste kommunane skal henge med. Dåverande helsemisnister Bjarne Håkon Hanssen, som la fram samhandlingsreforma i fjor, kalla ho for ei diger kommunehelsereform. Utfordringa for kommunepolitikarane blir å tenkje nytt saman med nabokommunane, meinte Hanssen.
For helsekommunar
Legeforeininga og Sjukepleiarforbundet har lenge vore pådrivarar for det dei har kalla interkommunale helsekommunar. Forbunda har i fleire år argumentert for at auka samarbeid over kommunegrensene vil vere viktig for å få til ei meir samanhengande behandlingskjede, til beste for pasienten, samt meir stabile og sterke fagmiljø. Kravet om eit forpliktande samarbeid mellom kommunane i form av helsekommunar er no svært aktuelt. Dette var noko av det mellom andre Lisbeth Normann, forbundsleiar for sjukepleiarane, la vekt på under ei høyring om samarbeidsreforma i Stortinget nyleg.
Bør starte pilotprosjekt
Eit anna forslag som blir fremja både av legane, sjukepleiarane og KS, er forslaget om pilotering og forsøkskommunar. På denne måten vil vi kunne få auka kunnskap om kva som verkar, og ikkje verkar før den omfattande helsereforma trer i kraft med full styrke. KS meiner oppretting av pilotkommunar kan vere ein metode for å skaffe kunnskap om kor vidt forslaget frå regjeringa om kommunal medfinansiering for pasientar i spesialisthelsetenesta vil vere effektivt. KS går i utgangspunktet mot forslaget om kommunal medfinansiering, men opnar samstundes for at dette kan vere ei løysing for enkelte pasientgrupper, til dømes dei over 80 år.
Usemje om finansiering
Det er usemje om i kva grad medfinansiering vil stimulere kommunane til å byggje opp eigne tilbod. Regjeringa foreslår mellom anna å overføre 20 prosent av tilskotta som no går til dei regionale helseføretaka, til kommunane. På denne måten får kommunane ein kompensasjon for medfinansieringa si.
Halvannalinjeteneste
Kan hende vil oppretting av større helsekommunar med interkommunale helsehus vere ei løysing. Dette inneber utvikling av fleire såkalla halvannalinjetenestetilbod som vi har sett i dømet over. Spesialiserte interkommunale sjukeheimsavdelingar vil kunne ta imot pasientar som treng behandling, men som samstundes er sterke nok til å greie seg utanfor sjukehuset. Her får dei oppfølging av trygge fagmiljø og tverrfaglege behandlingsgrupper.
