80 prosent av kommunane har sagt at dei ønskjer å lovfeste minstebemanning i barnehagane. I dag kan kommunane vedta minstenormer, men enkelte kommunar har også fjerna desse.
Det er per i dag ikkje talfesta kor mange vaksne det skal vere i barnehagane, men i januar i fjor føreslo det regjeringsoppnemnde Øie-utvalet å lovfeste at det skal vere éin vaksen per tre barn under tre år, og éin vaksen per seks barn over tre år, skriv Aftenposten. Ønsket frå kommunane kom som høyringssvar til utgreiinga «Til barnas beste».
– Eg opplever kravet som nokså unisont. Foreldre, fagmiljøet og barneombodet er for, og etter kvart har fleire politiske parti følgt etter. Denne lova må kome no. Regjeringa kan ikkje la vere å lytte til så mange kraftige stemmer, seier leiar Ragnhild Lied i Utdanningsforbundet til avisa.
Av 428 kommunar har 117 svart på høyringa til Øie-utvalet, og 93 av kommunane støttar anbefalinga. LO, Fagforbundet og barneombodet er også for, og nyleg skreiv over 17.000 personar under på eit opprop for å få fleire vaksne i barnehagane. (NPK)
