Stortingsrepresentant Tor Bremer (Ap) meiner Høgre sitt framlegg om valfritt sidemål er urovekkande.
– Innfører ein valfritt skriftleg sidemål i ungdomsskulen og i vidaregåande skule, vil det vere eitt av dei store åtaka på nynorsken i historisk perspektiv, seier Bremer til Firda.
Han reagerer sterkt på Høgre sitt framlegg om valfritt skriftleg sidemål i ungdomsskulen og vidaregåande skule. Bremer meiner dette vil få nynorskandelen til å rase i ungdomskkulen, på same måten som ein ser nynorsken i retur i vidaregåande skule. Han kallar framlegget eit åtak på vestnorsk kultur.
– Tek vi det obligatoriske sidemålet vekk frå ungdomsskulen, fryktar eg at verdien av å vere tospråkleg blir fjerna. Det vil vere eit stort tap. Dei tospråklege knekker språkkoden betre enn andre. Det er mellom annan difor vi nordmenn gjerne skjønar nabospråka våre betre enn svenskar og danskar gjer. Eg trur også tospråklegdomen er ein viktig grunn til at nynorskelevar gjerne gjer det bra i skulen, seier Bremer
