Kommunar med lite ressursar i skulesektoren skal få hjelp og støtte gjennom eit nytt opplegg som Kunnskapsdepartementet set i gang i haust.
– Mindre kommunar slit gjerne med at dei har små ressursar til å støtte skulane sine. Men det er ikkje nødvendig å slå saman kommunar for å gjere noko med dette. Me er no i gang med eit opplegg der me tilbyr hjelp til kommunar som treng det, seier kunnskapsminister Kristin Halvorsen (SV) til NTB.
I haust har 40 kommunar, dei fleste små, men også nokre større, fått tilbod om å delta i eit opplegg der dei kan få bistand frå fagfolk der dei treng det mest. Det kan vere spesielle opplegg for lesing eller støtte til matematikkundervisning. Dei utvalde kommunane får også fortrinnsrett på rektorutdanning dersom dei har rektorar som ønskjer det, og dei vil bli prioriterte når det gjeld etter- og vidareutdanning for lærarar.
– Utfordringane for dei mindre kommunane er at dei ikkje har mange tilsette i sentraladministrasjonen som har spesielle kunnskapar i pedagogikk og anna spesialkompetanse. Her gir me dei eit tilbod som kan rette opp dette slik at dei kan betre skuleresultata sine, seier Halvorsen. (NPK)
