Kraftinntekter kan bli ei sovepute, meiner fylkesmannen i Sogn og Fjordane. Alle dei fem kommunane i fylket som står på den såkalla Robek-lista, er kraftkommunar.
Kommunane på denne lista er i økonomiske vanskar og underlagt statleg kontroll. Det er i dag 51 kommunar på lista og mellom dei fem kommunar i Sogn og Fjordane som har inntekter over gjennomsnittet, skriv Nationen.
Vik og Bremanger hamna på lista etter Terra-skandalen i 2008. Årdal og Lærdal kom inn på lista i fjor og Høyanger i år. Fallande kraftprisar, nedgang i folketalet og færre arbeidsplassar er noko av bakgrunnen for problema. Og det er vanskeleg å skjere ned når inntektene minkar.
– Kommunane har nok vore vane med å ha god råd. Det er ikkje enkelt å senke driftsnivået i kommunane, men me arbeider no med å effektivisere drifta og samordne. Me har også fallande folketal, mindre eigedomsskatt frå næringslivet og kommunane får i tillegg overført fleire oppgåver, seier ordførar Aril Ingar Lægreid i Årdal til Nationen. (©NPK)
