Forslaget frå Skattedirektoratet om å kutte frå 288 til 27 kemnerkontor, får truleg ikkje fleirtal på Stortinget. Både Venstre og Kristeleg Folkeparti seier nei.
Forslaget om å redusere talet på skatteoppkrevingskontor fekk i utgangspunktet støtte frå Venstre, skriv Kommunal Rapport. No har partiet snudd.
– No har vi fått den informasjonen vi treng i denne saka, og vi ser at det vil innebere ei massiv sentralisering og fjerning av kompetansearbeidsplassar frå distrikta. Det er ikkje vår politikk, seier André Skjelstad, kommunalpolitisk talsmann for Venstre, til vekeavisa.
KrF har heile tida vore imot forslaget, ifølgje Kommunal Rapport.
Finansminister Siv Jensen (Frp) har tidlegare uttalt at forslaget handlar om å modernisere og effektivisere offentleg sektor.
Dei to representantane for Norges Kemner- og Kommuneøkonomers Forbund som deltok i arbeidet med rapporten for Skattedirektoratet, trekte seg frå arbeidet fordi dei meinte utgreiinga var mangelfull. (©NPK)
