Heim Nyhende Krig og kjærleik på Det Norske Teatret

Krig og kjærleik på Det Norske Teatret

Det vert både klassisk Romeo og Julie og ei åtte timar lang nattleg framsyning med historiar frå andre verdskrigen på Det Norske Teatret til våren.

 

«Andre verdskrigen – natt i verda» er ei storsatsing i vårprogrammet til Det Norske Teater for 2016, som blei presentert tysdag.

– Dette er sannsynlegvis det største prosjektet dette teateret har gjort. Vi skal fortelje forteljingar frå andre verdskrigen gjennom åtte timar, seier teatersjef Erik Ulfsby, som sjølv står for regien.

Døgnvillt teater
Publikum kan velje om dei vil sjå framsyninga på dagtid, eller om natta mellom midnatt og åtte om morgonen.

– Det er ukjent for meg kor stor marknaden for teater om natta er, men det har likevel vore viktig for oss å tenkje slik. Andre verdskrigen er utan samanlikning den største menneskeskapte katastrofen i menneska si tid på jordkloden og er slik sett ei natt i verda – og med freden så kjem lyset. Så det er ein tematisk tanke. I tillegg er det for oss som teater interessant å utforske ulike format, seier Ulfsby, og viser til at den seks timar lange framsyninga «Bibelen» frå 2013 gav inspirasjon til å finne anna materiale som eigna seg for det breie formatet.

LES OGSÅ: Marie Blokhus – Fuckings bullshit at ein ikkje treng andre enn seg sjølv

Radioteater
Fire dramatikarar med ulike nasjonalitetar har bidrege for å få inn stemmer frå forskjellige kantar av verda. Dramatikarane har kunne skrive fritt innanfor temaet, og forteljingane måtte heller ikkje liggje innanfor tidsrommet 1939– 1945.

– Andre verdskrigen har forma den verda som vi ser i dag. Difor meiner vi at ei slik framsyning også har rom for forteljingar som ikkje går føre seg i det tidsrommet som vi europearar definerer som andre verdskrigen, seier Ulfsby.

Det Norske Teatret samarbeider med NRK radioteateret om stykket, som har urpremiere i slutten av februar. Same månad har ei anna oppsetjing med krig som tema noregspremiere på teateret – «Frukost i det grøne» av Fernando Arrabal.

Kjærleiksmusikal
Den første premieren på vårprogrammet er musikalen «Tenk om» av Brian Yorkey og Tom Kitt. Dei to stod også bak «Next To Normal», som Det Norske Teatret hadde suksess med for fem år sidan. Også denne gongen har Heidi Gjermundsen Broch hovudrolla.

Framsyninga viser korleis tilfeldigheiter og samantreff kan ta livet i heilt ulike retningar, og publikum får oppleve to ulike versjonar av hovudpersonen sitt liv utspele seg på scena.

– Tenk om ein møter ein venn i parken, er 38 år, har budd i Sogndal og kjem barnlaus tilbake til byen. Ein treffer ei venninne, treffer ein kamerat – og i den augeblinken tek ein valet om å gå med den eine eller andre, så forandrar livet seg og blir totalt forskjellig. I det eine livet treffer ein sin store kjærleik, i det andre kjem ein til makt og forandrar Oslo by totalt, fortel regissør Marit Moum Aune.

LES OGSÅ: Tøysete nynorskmusikal om politikk og kongelege

Shakespeare i Hoem-drakt
«≈ [Tilnærma lik]» av den svenske forfattaren og dramatikaren Jonas Hassen Khemiri er ei anna framsyning med januarpremiere.

– Det er ein skarpskodd satire i beste Jonas Hassen Khemiri -stil, som følgjer fire-fem ganske gjennomsnittlege menneske og deira kamp for vekselvis å kome seg inn i det økonomiske systemet, få ein jobb og halde på ein jobb i nedgangstider. Og kanskje òg prøve å forstå korleis det å ha, eller ikkje ha, stabilitet og tryggleik påverkar oss, fortel regissør Peer Perez Øian.

I mars er det duka for den berømte kjærleikshistoria «Romeo og Julie» av William Shakespeare, denne gong i Edvard Hoem-omsetjing. Kjersti Dalseide og Axel Gherken Bøyum spelar hovudrollene.

Kvitebjørn for dei yngste
Også dei yngste har noko nytt å sjå fram til i vårprogrammet til Det Norske Teatret, når det kjende eventyret «Kvitebjørn Kong Valemon» blir teke til hovudscenen.

– Vi tar mål av oss å skape eit nytt, spektakulært eventyr for heile familien, som ein del av dette teaterets stadig sterkare ambisjon som teater for barn og unge, seier Erik Ulfsby.

«Kvitebjørn Kong Valemon» har urpremiere i april, med debutant Silje Lundblad i hovudrolla.

NYNORSK INSPIRASJON

Tilbyr digitalt språkkurs for kommunetilsette

Øygarden kommune har utarbeidd eit digitalt språkkurs som handlar om grunnleggjande nynorsk grammatikk og oppgåver undervegs. Kurset er lagt inn i KS Læring. Deltakarane vert...

Klar med nynorskkurs for lærarar

Kurset er laga for at lærarar som skal bruka nynorsk og undervisa i nynorsk skal bli trygge nynorskbrukarar. På oppdrag frå Bergen kommune har Nynorskkommunane...

Kurstilbod for skular og barnehagar

Arbeidet for å styrkja språkopplæringa i det offentlege er ei prioritert oppgåve for Landssamanslutninga av nynorskkommunar (LNK). Kursa våre blir administrerte og gjennomførte av Fretland...

Språklova: Dette er dei viktige paragrafane for nynorskkommunane

Frå og med 1. januar 2022 er nynorsk og bokmål formelt jamstilte og likeverdige språk på alle samfunnsområde. Formålet med lova er...

Har kommunen din levert høyringssvar om ny opplæringslov?

Arbeidet med ny opplæringslov er svært viktig for nynorskelevane og nynorskkommunane. LNK oppmodar alle medlemskommunane sine om å setja tydelege krav til...

Nytt samarbeid skal styrka nynorsken i barnehagane

Pirion og Sunnfjord kulturskule har laga til ei digital kursrekkje som skal hjelpa til med å styrkja nynorskarbeidet i barnehagane.

MEST LESE

Telemark fylkeskommune skal bruka minst 40 prosent nynorsk

– Eit godt og forpliktande vedtak, seier Noregs Mållag. Telemark fylkeskommune skal vera språkleg nøytralt og bruka minst 40 prosent nynorsk, har det nyleg blitt...

Desse endringane kan kome for nynorsken

Eit nytt spørjeord og nye kjønn på substantiv er noko av det Språkrådet har føreslått. Du har kanskje fått med deg at Språkrådet ønskjer at...

Alle nye lover bør kome på nynorsk!

Det er nynorsken sin tur til å bli favorisert i lovtekstane. Nynorskprosenten må opp. Når Stortinget vedtek ei lov, er ho skriven anten på bokmål...

NRK klarte ikkje nynorskkravet på radio og nett

NRK klarte nynorskkravet på TV, men ikkje radio og nett. Norsk Målungdom etterlyser fleire nynorskjournalistar. NRK har eit krav om 25 prosent nynorsk på kvar...