I ei prøveordning for vidaregåande skular har skulane slått saman to karakterar i norsk skriftleg, til berre éin. No skal åtte ungdomsskular prøve det same.
Det er åtte ungdomsskular i Bergen, Kongsberg, Nesodden, Tromsø, Asker og Oslo som no skal slå saman norskkarakterar på 8. og 9. trinn, fortel NRK.no.
– I heile 8. og 9. klasse vil elevane få berre éin karakter i skriftleg norsk. Dei får vanleg læring og oppfølging i både sidemål og bokmål fram til 10. klasse, då blir det tre karakterar, fortel oppvekstdirektør i Asker kommune Terje Larsen, som viser til at mange blir stressa av å tenkje på talkarakterar – framfor læring.
Ved Fyrstikkalleen skole i Oslo slår dei saman karakterane i sidemål, hovudmål og munnleg karakter til éin karakter, i ei frivillig ordning. Leiar i Elevorganisasjonen i Oslo, Rahman Aktar Chaudry, er positiv til prøveordninga med færre karakterar, men stussar litt over ordninga der tre karakterar blir éin, slik Fyrstikkalleen skole gjer det. Aktar Chaudry håpar heller ikkje samanslåingane går utover sidemålsundervisninga.
– Spesielt i Oslo der majoriteten av elevane har bokmål som si hovudform, er det viktig at ein ikkje forsømmer sidemålsundervisninga. Spesielt med tanke på den kulturhistoriske betydninga som nynorsk har i norskfaget, seier Chaudhry til NRK.no. (©NPK)
