Mange kan miste laurdagsavisa om Posten kuttar utdeling av post på laurdagar. Mange vil også få fredagsavisa på måndag.
– Dette er vi ikkje budd på. For oss vil det bli dramatisk om Posten ikkje lenger skal levere avis på laurdagar, seier Øystein Øygarden, redaktør i Vest-Telemark blad til Klassekampen.
Tysdag blei det klart at regjeringa vil gi Posten løyve til å kutte ut postomberinga på laurdagar. Staten kan spare 400 millionar kroner ved å gå ned frå seks til fem dagars postombering. I forslaget som no er sendt ut på høyring, teiknar regjeringa to alternativ: Eitt der all postombering på laurdagar tek slutt. Det andre alternativet går ut på at Posten framleis har ansvar for ombering av aviser, men ikkje anna post.
– Omdeling av aviser blir nokre stader ein sentral del av debatten, seier politisk rådgjevar Reynir Jóhannesson (Frp) i Samferdselsdepartementet
Landslaget for Lokalaviser meiner endringa kan få store konsekvensar i ei tid då dei fleste papiraviser allereie er nede i kneståande på grunn av fallende opplagsfall og svikt i annonseinntekter.
Også riksdekkjande aviser som Klassekampen, Dagsavisen og Vårt Land vil bli berørt.
Kommunikasjonsdirektør Stig Finslo i Amedia fryktar dette kan få dramatiske konsekvensar for fleire av dei 78 lokalavisene dei eig.
– Dette kjem på toppen av andre delar av den statlege mediepolitikken som påverkar media i ei svært negativ retning, seier Finslo.
Han viser til forslaget frå regjeringa om å kutte 50 millionar kroner i den direkte pressestøtta, forslaget om 8 prosent moms, og dessutan bortfallet av 50 millionar kroner i statlege annonsar i avisene. (©NPK)
