Sentrale målfolk i Møre og Romsdal stiller no spørsmålet: Kva vil Høgre med sidemålet og nynorsken?
– Høgre har dette året gjort to omstridde vedtak når det gjeld språk, kultur og utdanning. Partiet har programfesta at dei vil fjerne karakteren i sidemål både i ungdomsskulen og i vidaregåande og at dei vil la det personlege språkvalet til statlege tilsette styre staten sitt språk, skriv Terje Kjøde, Sunnmøre Mållag, Øyvind Fenne, Romsdal Mållag og Trond Skogseth, Nordmøre Mållag i eit lesarbrev i Tidens Krav.
Dei viser til at Høgre skriv dette om sidemålsordninga: «Bruke tekster både på bokmål og nynorsk i norskfaget gjennom hele skoleløpet. Avvikle ordningen med egen karakter og eksamen i sidemål i ungdomsskolen og den videregående skolen».
– Det var stor motstand mot vedtaket på Høgre sitt landsmøte i vår, og ei rekkje representantar har prøvd seg på ulike tolkingar. Fleire har i ettertid sagt at vedtaket tyder at det framleis skal vere skriftleg opplæring i sidemål. Likevel seier skulebyråd i Oslo for Høgre, Torgeir Ødegaard, at vedtaket tyder at skriftleg sidemålsundervisning skal vere valfri. Så kva meiner Høgre eigentleg?
No etterlyser mållagsleiarane kva listetoppane i Møre og Romsdal meiner om nynorsken og sidemålet.
– Sist onsdag uttalte Høgre-leiar Erna Solberg i Vestlandsdebatten på NRK at alle skal lære sidemål, men det skal ikkje vere ei skriftleg øvingsform. Dvs. ikkje ein gong valfri opplæring i sidemål (les nynorsk)! Det er klar tale, men dramatisk, skriv dei.
Dei stiller også spørsmål ved Høgre sitt framlegg om å erstatte dagens rett til å få svar på eiga målform med ein rett for tilsette i staten og språknøytrale kommunar til å bruke si eiga målform.
Les også: – Sidemålet gir elevane angst
– Meiner Høgre då at verken kommunar, politi, Nav, fylkeskommunar, helseføretak eller andre etatar ute i nynorskområda skal kunne vente at staten vender seg til dei på nynorsk? Er det rett og slett opp til det personlege valet åt byråkraten?
