Olaug Nilssen sin roman «Få meg på, for faen» blir film.
Romanen kom ut i 2005, og handlinga går føre seg i bygda Skoddeheimen, Bergen og i Oslo. Filminnspelinga startar Jonsokaftan, og om alt går etter planen kjem filmen på Kino våren 2011, skriv Firda.
Allereie i 2006 vart Nilssen kontakta av regissør Jannicke Systad Jacobsen med spørsmål om løyve til å lage film av boka.
– Men eg ville halda filmplanane hemmelege i tilfelle det ikkje vart noko av, seier Nilssen til Firda.
Filmen har eit totalbudsjett på 18 millionar kroner, og regissør Systad Jacobsen har også skrive manuset til filmen og tek for seg eit kapittel i boka. Kapittelet handlar om den unge jenta Alma som vil på og i gang med livet, og ikkje minst med seksuallivet.
Det er enno ikkje bestemt kvar filmen skal spelast inn, men Rogaland kan vere ein aktuell stad. (NPK)
