Bergen Offentlige Bibliotek vil i haust byrje å selje bøker som ingen vil låne. Det har biblioteket i Stavanger gjort lenge.
– Frå oktober kjem vi til å selje bøker som vi ikkje får lånt ut, seier Leikny Haga Indergaard, biblioteksjef ved Bergen Offentlige Bibliotek til Bergens Tidende.
Biblioteket rommar meir enn 700.000 einingar av musikk, film og haugar med bøker. Men samtidig som nokre bøker har lange ventelister og slitne permar, står andre urørte igjen i hylla. Biblioteksjefen seier at det er dei fint brukte bøkene som skal leggjast ut for sal.
Tidlegare har biblioteket kassert alt som går ut av samlinga, med unntak av at nokre bøker er blitt gitt til Frelsesarmeen.
– Heia Bergen! Dette må dei berre halde fram med, seier Linn Tønnesen, litteraturformidlar ved Sølvberget Bibliotek i Stavanger om boksalet i Bergen.
På biblioteket i oljehovudstaden sel dei bøker heile året, i tillegg til den store bokbasaren dei arrangerer kvar haust. Årleg får biblioteket inn rundt 10.000 kroner, pengar som dei siste åra er blitt donerte til eit veldedig formål.
I Bergen skal pengane biblioteket tener på boksalet brukast til å kjøpe inn nye, aktuelle bøker. (NPK)
