Festivalen som har som føremål å fremje rock og pop på eige språk går av stabelen for 10. gong.
– Vi satsar i hovudsak på musikk på eige språk og dialekt, helst innafor pop/rock-sjangrane. Målet er å fremje det å framføre musikk på eige mål, fortel informasjonsansvarleg Katrine C. Fredheim til LNK.no.
Festivalen finn stad på Årdalstangen ved Sognefjorden, og dette året lokkar dei med mellom andre Lars Vaular, Madcom og Kaizers. Men også namn som har ei noko lengre fartstid er å finne på plakaten, her finst mellom andre Raga Rockers og Bjørn Eidsvåg.
Den første Målrock-festivalen fann stad i 2003, då med Tungtvann, Gåte og Hellbiliies som nokre av hovudattraksjonane. Festivalen har hatt omlag 2 500 besøkande årleg.
Som så mange andre festivalar er også Målrock tufta på ei dugande dugnadsvilje. Heile apparatet rundt brukar fritida si på å skipe til festivalen.
– Vi jobbar også tett med lokale lag og organisasjonar som jobbar dugnad og tenar pengar på det til drifta si, seier Fredheim.
