NRK Nynorsk mediesenter ønskjer framlegg til journalistar som er aktuelle for Kulturdepartementet sin nynorskpris. Så langt har vinnarane kome frå etermedia, men det betyr ikkje at juryen ser vekk frå avisene, opplyser NRK Nynorsk mediesenter.
– Lokalavisene er sjølve grunnmuren for nynorsk i media, men det har så langt synt lite att i bunken med framlegg, uttaler mediesenteret som legg vekt på at alle forslag er like velkomne.
I fjor kom det inn 40 framlegg med til saman 30 namn. Tidlegare har Linda Eide i NRK, Kjell-Erik Kallset, leiar for politisk avdeling i Dagsavisen, nyhendeanker Odd Reidar Solem i TV 2 og programleiar og platepratar i NRK P3, Ronny Brede Aase, fått prisen. Prisen, som vert delt ut under Dei nynorske festspela i juni, er 50 000 kroner og eit kunstverk.
