Språkrådet poengterer i ei pressemelding at det ikkje er stadfesta gjennom forsking at ein blir betre i hovudmålet viss ein får mindre opplæring i sidemål.
– Dess lågare nynorskkompetansen til bokmålsbrukarane vert, dess høgare vert venteleg terskelen for at dei brukar nynorsk – noko som vil bidra til å marginalisere nynorsk og nynorskbrukarar, heiter det i pressemeldinga.
Språkrådet meiner også at sidemålsopplæringa treng fornying, og at føremålet med sidemålsopplæringa må kome betre fram i den nye læreplanen for norsk, noko også Utdanningsdirektoratet etterlyser.
Dei meiner også at arbeidet med ny læreplan i norsk må byggje på dei to grunnleggjande dokumenta for språkpolitikken og språkopplæringspolitikken som Stortinget har behandla, nemleg meldinga Språk bygger broer frå Kunnskapsdepartementet og meldinga Mål og meining frå Kulturdepartementet.
