Språkrådet meiner endringar i læreplanen og vurdering i norskfaget bør sikre betre vilkår for nynorsk.
Det kjem fram av eit brev Språkrådet har sendt kunnskapsministeren og kulturministeren.
– Vi deler den uttrykte ambisjonen om at det trengst særskilde tiltak som kan fremje nynorsk også i skulen, heiter det i brevet der Språkrådet viser til at endringar må samsvare med dei språkpolitiske føringane, blant anna språkmeldinga.
– Forslaga til revidert læreplan og nye ordningar for sluttvurdering vil innebere svakare opplæring i nynorsk for bokmålselevar og i bokmål for nynorskelevar. Kva status nynorsk har i samfunnet, og kva område nynorsk blir brukt på, heng nok mellom anna saman med kva plass nynorsk får i norsk og andre fag i skulen. Vi finn det nødvendig å stille spørsmålet om dette er i samsvar med gjeldande språkpolitikk om å fremje nynorsk språkbruk spesielt, heiter det i brevet frå styreleiar Ottar Grepstad og direktør Arnfinn Muruvik Vonen i Språkrådet.
