Det er for lett å sleppe unna med ulovlege offentlege innkjøp, meiner næringsminister Monica Mæland (H). No sender ho forslag til endringar i innkjøpsreglane ut på høyring.
– Handhevinga av regelverket mot ulovlege direkte innkjøp er ikkje god nok. Difor vil eg gje Klagenemnda for offentlege innkjøp (KOFA) moglegheit til å påleggje gebyr og bringe saker inn for retten, seier Mæland.
KOFA får i dag ei rad klager på ulovlege direkte innkjøp, men kan etter ei lovendring i 2012 berre uttale seg om at det har skjedd eit lovbrot. Det får ingen rettslege konsekvensar for oppdragsgjevaren.
– Dagens ordning der leverandørane må gå til domstolane for å handheve grove brot på innkjøpsreglane har rett og slett ikkje vore effektiv nok, seier Mæland.
Dersom Mæland får det som ho vil, kan klagenemnda enten kunne påleggje gebyr for brot på reglane eller bringe ei sak inn for retten for å få kontrakten kjent utan verknad. Der nemnda fastslår at oppdragsgjevar har gjort eit ulovleg direkte innkjøp, kan straffa bli eit gebyr på inntil 15 prosent av verdien på innkjøpet.
Fristen for å komme med innspel til høyringsforslaget er sett til 14. august. (©NPK)
