Juristmållaget har gjeve årets målpris til advokat Steinulf Tungesvik. Han har over lang tid vore ein profilert talsmann for nynorsken, både som statssekretær og som leiar i Noregs Mållag.
Juristmållaget vil likevel meina at han alt i 1998 nådde eit høgdepunkt i livet, då han vart leiar i Juristmållaget. Han hadde vervet til han våren 2005 tok over som leiar i Noregs Mållag, før han same haust vart henta som statssekretær. I tillegg har han vore leiar i Studentmållaget i Oslo.
I politikken har Tungesvik sett spor etter seg som statssekretær, i Helse- og omsorgsdepartementet under Bondevik II-regjeringa, og i to periodar i Samferdselsdepartementet i den raudgrøne regjeringa. Mellom anna fekk han saman med minister Liv Signe Navarsete endra haldningane i Samferdselsdepartementet slik at departementet gjekk frå å vera blant dei dårlegaste til mellom dei beste i klassen til å følgja mållova.
I målrørsla har Tungesvik sett spor etter seg mellom anna ved å stå bak forprosjektrapporten Norsk ordbok 2014, minneseminar etter Knut Robberstad, lovmålsseminar for jusstudentar og ved å profilera kampanjen «Slepp nynorsken til», retta mot riksavisene i hovudstaden.
Sidan 2000 har målprisvinnaren arbeidd i advokatfirmaet Kluge både i Oslo og Bergen i dei periodane han ikkje har vore statssekretær. Han har der konsekvent vist at nynorsk er ei levande målform i forretningsadvokatverda.
Prisen vart delt ut på årsmøtet i Juristmållaget i Bergen.
