Stiftinga Fritt Ord og Sparebankstiftelsen DnB NOR har begge no løyvd 1,5 millionar kroner i gåve til Nasjonalt Garborgsenter.
Millionane skal brukast til å bygge opp utstillingsdelen i Garborgsenteret.
– Dette betyr at me tar eit langt skritt mot å fullføre utstillingsarbeidet. No blir det mogleg å finansiere det som har vore vårt mål, seier prosjektleiar i Nasjonalt Garborgsenter Einar Schibevaag.
Viktig med ungdom
Fritt Ord arbeider for å verne om og styrkje ytringsfridomen i Noreg, særleg ved å stimulere til levande debatt og den uredde bruken av det frie ordet. Fritt Ord har også tidlegare løyvd 200.000 til forprosjektfasten til Garborgsenteret. No støttar dei senteret med 1,5 millionar kroner. Det same gjer Sparebankstiftelsen DnB NOR. Stiftinga støttar prosjekt som skaper engasjement, har verdi over tid, som involverer frivillige og som gir eit positivt bidrag til barn og unge.
Sissel Karlsen i Sparebankstiftelsen DnB NOR legg vekt på at stiftinga svært sjeldan støttar offentlege og statlege tiltak.
– Noko av det som vart avgjerande her var at Garborgsenteret har invitert inn ungdom til å delta i utforminga av senteret, og til å meine noko. For oss var det viktig at senteret ynskjer å skape samfunnsengasjement blant barn og unge, seier Karlsen.
Øyremerkte midlar
Sparebankstiftelsen DnB NOR har øyremerkte midlane til medierommet i utstillinga på senteret. Ein av visjonane på senteret er at barn og unge skal lære ved å gjere, ein visjon dei også deler med resten av Jærmuseet.
Garborgsenteret skal vere ein nasjonal base for å drive opplysing for – og samla informasjonar om – verket og livet til Arne og Hulda Garborg. Det skal vere eit fagleg senter med sikte på å drive forskning og fordjuping i litteraturen og livet til Arne og Hulda Garborg. Senteret vil få ein forskningsdel, ein formidlingsdel og ein utstillingsdel. I fjor løyvde regjeringa 7 millionar kroner til å bygge opp innhaldet i senteret. I tillegg har blant anna Time Sparebank alt løyvd 2 millionar kroner.
