Førde har utropt seg sjølv som nynorskbyen, men bybiletet speglar ikkje den ønskja profilen.
«No er eg kommen til nynorskbyen» er neppe det fyrste som slår ein besøkande i Førde, skriv avisa Firda.
Gjennom bybiletet florerer bokmålsorda på namn og skilt, og nokre stader blanda med nynorsk. Enkelte kjeder nyttar til og med engelsk.
Ved Orkelbog Bil i Førde reklamerer dei til dømes med «pene biler selges» og «spesielle biler skaffes». Roald Orkelbog ved Orkelbog Bil forklarer bokmålsbruken med at nordmenn flest nyttar bokmål, og seier til Firda at han ikkje er så oppteken av at Førde kallar seg for nynorskbyen.
Ap-politikar og pensjonert norsklærar Ivar Svensøy meiner Førde har ein lang veg å gå i bruken av nynorsk. Svensøy meiner det ville vore eit kvalitetsstempel, ikkje berre for den enkelte butikk, men for heile Førde, om byen stod fram med ein tydeleg og heilskapleg nynorskprofil.
– Aktørar i næringslivet må ha ein tydeleg vilje til å satse på nynorsk. Det er det aller viktigaste. Så kan dei kanskje få hjelp av pensjonerte lærarar og kanskje mediefolk. Mange ville sikkert tykkje det var moro å bidra, seier Svensøy til Firda. (©NPK)
