Nei til EU-leiar Heming Olaussen oppmodar partia på Stortinget til å tenkje på EU-motstanden når dei nominerer kandidatar.
Etter det ei meiningsmåling som vart gjort i sommar, viser, er 73 prosent av folket mot at Noreg skal bli EU-medlem. Samtidig har Nei til EU merkt seg at 40,8 prosent av stortingsrepresentantane er jafolk.
Leiaren i Nei til EU, Heming Olaussen, oppfordrar derfor nominasjonskomiteane i partia til å ta omsyn til EU-motstanden i folket når dei nominerer kandidatar til Stortinget.
– Gong på gong får vi eit Storting som er ein heilt annan stad enn folket. Samtidig er det lite som skil så mykje i norsk politikk som dette, når det kjem til stykket, seier Olaussen til Klassekampen.
Han meiner at særleg Arbeidarpartiet og Høgre bør følgje oppfordringa hans. Mens 67 prosent av Ap-veljarane er EU-motstandarar, er 45,3 prosent av stortingsrepresentantane til for EU-medlemskap
Rundt 70 prosent av Høgre-veljarane seier nei til EU, mens 96,7 prosent av stortingsrepresentantane til partiet er jafolk.
– Høgre er ekstrempartiet. Dei har enno ikkje røysta mot eit einaste EU-direktiv. Alle andre parti har gjort det. Eit sterkt Høgre i spissen for eit borgarleg fleirtal på Tinget kan gjere mykje skade, trur Olaussen. (NPK)
