NRK Nynorsk Mediesenter har fleire kurs for offentleg tilsette. No tilbyr dei også kurs i å skrive god nynorsk.
Wenche Schanke Eikum er kursansvarleg hjå NRK Nynorsk medie-senter og har god tru på at det finst ein marknad for kurs i å skrive god nynorsk for offentleg tilsette.
– Det trengs nok ei auka bevisstgjering om nynorsk språk, om at det er viktig med eit godt språk, og kvifor det er det. Mange seier at nynorsk er så fint som talemål og til dømes i litteraturen. Utfordringa vår må jo vere å få fram at det også fungerer bra som språk i saksdokument, seier ho.
Eikum understrekar at ho har lite erfaring med reine språkkurs i kommunane. Fram til no har NRK Nynorsk mediesenter fokusert på å tilby kurs i medietrening, formidling og journalistisk skriving for nett. Men no tilbyr senteret kurset God nynorsk, som skal hjelpe offentleg tilsette til å skrive eit levande og godt nynorsk. I kurset får ein innføring i dei viktigaste skilnadane på bokmål og nynorsk, praktisk rettleiing og skriveøvingar samt undervisning i å bygge opp eit godt språk. Så langt har Eikum halde kurs for ei offentleg verksemd og for Fylkesmannen i Hordaland. Utfordringa er ofte dei som opphavleg skriv bokmål, men som på grunn av jobben må gå over til nynorsk.
– Men uavhengig av målform vil eg påstå at den største utfordringa når det gjeld språk, er å skrive slik at folk forstår og lausriv seg frå det byråkratiske språket. Og då er nynorsk bra, det er eit aktivt språk, slår ho fast.
