Redaktør Bjarne Tormodsgard i Hallingdølen vart måndag feira med Nynorsk redaktørpris for 2012.
– Han bidrar til å styrkje nynorsken som mediespråk på ein framifrå måte, seier leiaren i Mediemållaget, Berit Rekve.
Bjarne Tormodsgard (født 1956) vaks opp i Ål og er utdanna adjunkt frå Eik lærarhøgskule og Oppland distriktshøgskule.
Mediemållaget peikar på at Hallingdølen er ein av dei viktigaste kanalane for å vidareføre språktradisjonen i eit område med sterkt press på både nynorsk og lokal dialekt. Laget trekkjer det også fram som eit vesentleg redaktøransvar at nytilsette med ein annan språkbakgrunn opplever overgangen til nynorsk som arbeidsspråk som ei positiv utfordring.
Tormodsgard fekk overrekt prisen, eit diplom, under landsmøtet til Norsk Redaktørforening i Oslo måndagskvelden. (©NPK)
