Berre seks av dei hundre mest utlånte barne- og ungdomsbøkene i nynorskkommunar er nynorskbøker.
– Folk i det nynorske kjerneområdet les faretruande lite nynorsk, seier Ragnfrid Trohaug, redaktør i Samlaget til Framtida.no.
Biblioteksstatistikken for heile landet viser at berre 1 prosent av dei tusen mest lånte bøkene var nynorskbøker. For dei nynorske biblioteka var talet 6 prosent, ifølgje tal som Samlaget har henta inn frå flesteparten av biblioteka, skriv Framtida.no.
Dei dårlege lånetala for nynorskbøker samsvarer dermed ikkje heilt med at mellom 5 og 8 prosent av bøkene som er gitt ut dei siste tjue åra er skrivne på nynorsk. Det skal heller ikkje vere kvaliteten det kjem an på, då nynorskbøker for barn og unge stadig vekk håvar inn prisar. Fire av dei seks siste Brageprisane for barne- og ungdomsbøker har gått til nynorske bøker.
– Eg trur ein del formidlarar, lærarar, bibliotekarar og foreldre ikkje tenkjer på ungane som nynorskbrukarar, seier Ragnfrid Trohaug og legg til:
– Alle skulebibliotek burde tapetserast med nynorskbøker. (NPK)
