Forfattaren Einar Økland blir festivaldiktar på årets Falturiltu-festival, den einaste nynorske barnelitteraturfestivalen i verda.
Einar Økland debuterte i 1963, 23 år gammal, og har sidan då gitt ut nærare åtti bøker innafor mange sjangrar. Økland var heilt sentral den store nyskapinga i barnelitteraturen på syttitalet, både gjennom skrivemåte, temaval, og gjennom å løfta fram unge og spanande illustratørar som Wenche Øyen (Ein god dag, 1979, Ei ny tid , 1981 ) Kari Bøge (Du er så rar, 1973, Snakk med doktor Ost , 1977), Oddvar Torsheim (På frifot, 1978) og Gerhard Stoltz (Her er ingen papegøye , 1984, Den dumme, 1988)
Økland er frå Valevåg i Sveio, og er utdanna psykolog. Han debuterte som forfattar med diktsamlinga Ein gul dag i 1963 og har seinare følgt opp med romanar, skodespel, essay og barnebøker. I tillegg har han gjendikta utanlandsk lyrikk og vore ein sentral person i dei litterære tidsskrifta Profil og Basar. Han har motteke ei lang rekke prisar, bl.a. Aschehougprisen 1988, Doblougprisen i 2000 og Gyldendalprisen i 2006, og han har vore festivalforfattar ved Festspillene i Bergen i 1992 og Dei nynorske festspela i 2002.
Innan faglitteraturen har Økland lenge gjort eit stort og viktig arbeid med å løfta fram deler av (barne)kulturen som er forsømt av kunst- og litteraturhistorikarar og etnologar. Han har grundig dokumentert arbeidet til norske illustratørar med trykksaker som iddisar, plateomslag, bokomslag og reklameplakatar. Den siste boka hans «Den norske maleboka» (2012) er eit eksempel på dette.
Einar Økland er truleg den einaste norske forfattaren som bur i ein veg kalla opp etter seg: Einar Øklands veg i Sveio, fortel falturiltufestivalen i ei pressemelding.
