I 2009 deltok 12 kommunar og eitt regionråd på Distriktssenteret sin omdømmeskole. Deltakarane har fått auka motivasjon for omdømmearbeid og opplever at innhaldet er relevant i forhold til det dei jobbar med.
Det kjem fram i ei evaluering gjort mellom fjorårets deltakarar. Prosjektleiar Anne Irene Myhr ved Distriktssentetert seier på senterets heimesider at det enno er for tidleg å seie noko om effektane av Omdømmeskolen.
– Men det er ei viktig tilbakemelding å sjå at teori blir sett om i praksis, seier Myhr.
Dei 37 deltakarane legg vekt på at det trengst både fagleg og praktisk påfyll, samstundes som det er viktig å treffe kommunar som ein opplever er i same situasjon som ein sjølv.
Erfaringane frå 2009 skal no brukast til utviklinga av Omdømmeskolen 2010, kor det blir lagt enno meir vekt på konkrete og praktiske døme.
– Det å skape nettverk og dialog mellom rådmenn, ordførarar og prosjektleiarar som jobbar med omdømmearbeid, og som har vore og er midt i omdømmestrategiprosessar, opplever vi som ein god måte å overføre erfaringar på, seier Anne Irene Myhr.
Omdømmeskolen vart første gong gjennomført i 2008 på initiativ frå Kommunal- og regionaldepartementet. Sidan har Distriktssenteret overteke skolen. Føremålet med skolen er å gje kommunar og småsamfunn inspirasjon til å jobbe med stadsutvikling og omdømmebygging.
