Samferdselsministeren vil utgreia 130 km/t på E39, sjølv om det vil gi sterk auke i klimautsleppa.
Laurdag lanserte Statens vegvesen tanken om at nye E39 mellom Bergen og Stavanger kan få ei fartsgrense på heile 130 kilometer i timen. Statssekretær Bård Hoksrud (Frp) støtta forslaget og sa til Bt.no at når det gjeld nye motorvegar bør farten vera 130 km/t.
Naturvernforbundet i Hordaland reagerer på dette.
– Dette vil gjera det endå eit hakk verre å få til den reduksjonen i klimautslepp politikarane har lova. Om bilane aukar farten frå 65 km/t til 130 km/t, doblar du farten, men mangedoblar CO2-utsleppa, seier Gabriel Fliflet i Naturvernforbundet til Bergens Tidende.
Kritikken får ikkje samferdselsminister Ketil Solvik- Olsen (Frp) til å snu i saka.
– CO2-utsleppa er eit argument, men det er ikkje tungtvegande nok til at me skal la vera å vurdera auka fartsgrense. Det er mange andre samfunnsgevinstar av auka fart, slik som næringsutvikling og større arbeidsmarknader. Så må me vega for og imot. Det er det politikk handlar om, seier han, ifølgje avisa.
I ein ny rapport frå BI viser at dei samfunnsøkonomiske gevinstane ved å kobla bu- og arbeidsmarknaden mellom Bergen og Stavanger blir enorme. Produktivitetsgevinsten blir mellom 33 og 55 milliardar kroner i året for Stavanger/Haugesund-regionen og 15-50 milliarder kroner per år for Sunnhordland og Bergen. Med ei fartsgrense på 130 km/t kjem ein ned i to timar køyretid mellom byane, noko som vil gi endå større produktivitetsgevinst.
