Kvart år sender offentlege verksemder ut meir enn 125 millionar brev på papir. No har regjeringa endra regelverket for å gjere det lettare å gå over til nettbasert kommunikasjon.
Tidlegare måtte forvaltninga be om samtykke til kommunikasjon på nett. Men med dei nye reglane er samtykke ikkje lenger nødvendig. I staden må innbyggjarar som føretrekkjer brev på papir, reservere seg mot dei nettbaserte løysingane.
Dei nye reglane blei vedtekne i statsråd fredag.
– Vi har lenge fylt ut sjølvmeldinga på nett og logga oss inn for å sjå skatteoppgjeret. Regelendringa banar veg for meir av slik nettbasert kommunikasjon, seier kommunal- og moderniseringsminister Jan Tore Sanner (H).
– For folk flest betyr det betre tenester, raskare svar og greiare oversikt over korrespondansen med det offentlege, forsikrar han.
Regjeringa har samtidig gjort endringar i eforvaltningsforskrifta for å skjerpe krava til informasjonstryggleik. (©NPK)
