Ni av ti ordførarar i Hordaland og Sogn og Fjordane seier nei til å sjølve bestemme om legar kan reservere seg mot å vise kvinner til abort.
50 av dei 59 ordførarane i dei to fylka har svart på spørsmåla frå Bergens Tidende, og 89 prosent meiner at ikkje kommunen, men staten, bør avgjere om det skal vere ein reservasjonsrett. I tillegg seier 86 prosent nei til at fastlegar i kommunen bør kunne reservere seg, dersom kommunane får bestemme.
– Eg tenkjer at denne typen verdispørsmål er vanskelege å ta opp i forhandlingar, og endå vanskelegare når det skal gjerast lokalt, seier Os-ordførar Terje Søviknes (Frp). Han meiner staten bør avgjere spørsmålet, og seier sjølv nei til reservasjonsrett for nye legar i sin eigen kommune.
Olaug Bollestad (KrF) seier at undersøkinga gjer inntrykk, men ho avviser kritikken.
– Når ein kjempar for ein minoritet, så kjempar du mot ein majoritet. Det ligg i sakas natur at vi ikkje har fleirtal i denne saka. Vi ønskjer at det skal vere rom for at folk kan tenkje annleis.
Helseminister Bent Høie vil ikkje svare på om reaksjonane har fått han til å endre syn.
– Vi ser fram til å få inn svar frå kommunane på dette. Grunngjevinga for å sende dette på ei så omfattande høyring var å få synspunkt og innspel på korleis saka bør avgjerast, seier han til avisa. (©NPK)
