Verken Venstre, Frp eller Miljøpartiet Dei Grøne har partiprogram på nynorsk.
– Eg tykkjer ikkje me skal ha så mykje fokus på dette med nynorsk, seier stortingsrepresentant Gjermund Hagesæter i Frp til Framtida.
Trass i at Hagesæter sjølv er medlem av Løvebakken Mållag meiner han nynorskbrukarane er så språkmektige at dei godt kan lese bokmål. Hovudårsaka til at programmet ikkje er på nynorsk er kostnaden med omsetjinga.
I partiprogrammet til Venstre kan ein lese: «Vi må ta utfordringene knyttet til nynorsk som hovedmål på alvor, slik att elevene får et kvalitativt godt tilbud og en opplæring som gjør at nynorsk blir et reelt alternativ for de som ønsker det.» Også her er grunnen til at dette står på bokmål manglande ressursar.
– Me har ikkje kapasiteten til å omsetje partiprogrammet til nynorsk, seier Kjartan Almenning i Venstre, og legg til at dei har ein nynorsk versjon av hovudbrosjyren.
– Hadde det vore ei ideell verd hadde me hatt partiprogrammet vårt på nynorsk óg, seier Almenning til Framtida.
– Me vedtok i mai at me skulle ha ein nynorskversjon. Denne er noko forseinka, men skal vere klar i slutten av juli, forsikrar Harald Nissen, nasjonal talsmann i Miljøpartiet Dei Grøne.
