– Alt i alt er det vel ikkje så mykje overraskande i regjeringserklæringa FrP og H la fram i går, men eg har med interesse merka meg at det kontroversielle punktet om valfritt sidemål er borte, seier styreleiar i LNK, Solfrid Borge.
Borge meiner også det er positivt når det står at regjeringa vil utgreie om sidemålsopplæringa kan gjerast betre.
– Det er skuffande at det håplause framlegget om å endra eller fjerna mållova, ligg fast, sjølv om det neppe er fleirtal i Stortinget for ei slik endring. På alle andre område slåss regjeringspartia for at “folk flest” skal ha valfridom, men når det gjeld språk i Staten – les Oslo – er det altså byråkratane som skal kunna velja, ikkje folk flest, seier Borge som legg til at ho og reagerer på at det står at regjeringa vil satsa på norsk litteratur, og at det i neste setning står at partia vil reversera bokloven.
– For meg høyrest det ut som ei sjølvmotseiing, avsluttar Borge.
