I vår kan du sjølv velje om du vil få post i ei digital postkasse i tillegg til den fysiske postkassa. Posten Noreg lanserer eit digitalt postsystem.
– No går stadig meir av kommunikasjonen digitalt. Posten vil vere ein del av denne utviklinga, seier konsernsjef Dag Mejdell.
Postens nye digitale postkasse skal gjere det enkelt å sende, ta imot, behandle og arkivere viktig post. Systemet skal ha same tryggleiksnivå som nettbankane.
– Med mange nettsider, brukaridentitetar og passord er det ikkje enkelt å vere forbrukar. Når Posten no lanserer Digipost vil all denne kommunikasjonen kunne samlast i éi digital postkasse, seier Mejdell.
Det har vorte mindre fysisk post dei siste åra på grunn av overgang til digitale løysingar. Den trenden vil halde fram.
– Vi er merksame på at den digitale satsinga vår vil ha konsekvensar for ordinær post. Men gjer ikkje Posten dette, gjer nokon andre det. Posten må vere med og vi vil vere først ute i Noreg, seier postsjefen.
Postens nye digitale postkasse baserer seg på gateadressa til folk i tillegg til personnummeret. Dermed følgjer den digitale postkassa med om ein endrar adresse. Målet er at det nye digitale postsystemet skal vere i ordinær drift første halvår i år. (NPK)
