Etter sju år gir bandet Rammsund seg no.
Etter sju år med nynorskifisering av Rammstein seier gutane i Rammsund takk for seg, skriv Studvest.no.
– Det heile har gått langt betre enn me håpa på. Me har nådd toppen no, så det er ikkje vits i å dra det lenger. Me skulle ha det morosamt, men no var det i ferd med å bli for seriøst. Det var ikkje eit mål å ende opp som til dømes Postgirobygget, som har gitt ut fleire skiver, men framleis hovudsakeleg spelar låtar frå debutskiva Melis, seier vokalist Geir «Gråbein» Nordby til studentavisa.
Det vart heilt naturleg for bandet å bruke nynorsk.
– Fyrst prøvde me å oversetje til bokmål, men det fungerte ikkje. Med nynorsk klarte me derimot å halde på det harde uttrykket frå tysk. Det heile vert meir teatralsk.
– Det er synd at dei no legg opp. Dei er heilt klart ein av dei kule artistane som syng på nynorsk, og dei rettar opp ein del av det negative ryktet til målforma, seier leiar i Studentmållaget i Bergen, Odin Hørthe Omdal.
