To dagar før katastrofefilmen «Bølgen» har premiere i august, skal det vere ein stor konferanse i Geiranger om rasovervaking og varsling.
Filmen har premiere 28. august i år og 26. og 27. august inviterer Stranda kommune til ein stor raskonferanse på Hotel Union i Geiranger.
– Det er ikkje tilfeldig at vi held denne konferansen i dagane før filmpremieren, seier ordførar Jan Ove Tryggestad til Sunnmørsposten.
Han fortel at dei legg opp til ein konferanse med eit høgt, fagleg innhald. Det kjem føredragshaldarar frå både inn- og utland som skal snakke om overvaking og varsling i samband med fjellras.
Stranda-ordføraren ventar stor interesse for temaet, ikkje minst på grunn av filmen «Bølgen» som er spelt inn i området. Han håpar raskonferansen vil etablere seg som ei årleg hending, skriv avisa. (©NPK)
