– Dialekt er eit sterkt språk med sterke uttrykk, seier arrangøren av den fyrste festivalen for dialektartistar.
Initiativtakar til Dialektrock 2010 Bjørn Saksgård seier til NRK at festivalen jobbar for at artistar som brukar dialekt skal nå ut til eit større publikum. Fleire av dei store artistane i Noreg dei siste 20 åra uttrykkjer seg på dialekt, til dømes Hellbillies, Bjørn Eidsvåg, Jan Eggum, Odd Nordstoga, Halvdan Sivertsen, og Åge Aleksandersen.
No vil Dialektrock-arrangørane synleggjere dialektartistane som ikkje er like store.
Banda som spelar på Dialektrock 2010 er Bergstaden old stars, Betty unplugged, Transistor og Bjørn Saksgård & DNB. Festivalen blir arrangert på utestaden Blæst i Trondheim søndag 14. mars kl 20.00. (©NPK)
