Kommunane som alt er vedtatt samanslåing, får titals millionar i statsstøtte. Pengane kan dei bruke på kva dei vil.
Førebels har elleve norske kommunar vedteke å slå seg saman til fem nye. Prislappen for desse samanslåingane, i form av løyvingar frå Kommunal- og moderniseringsdepartementet, er på 225 millionar kroner. Det blir ikkje stilt krav til bruk av midlane, og kommunane må ikkje levere inn søknad om kva dei treng, skriv Nationen.
– Med ei omfattande kommunereform var det ønskjeleg å gjere dekninga av eingongskostnadar ved ei samanslåing meir føreseieleg for kommunane og unngå mange og tidkrevjande søknadsprosessar, seier seniorrådgjevar Helge Kvandal i kommunaldepartementet til avisa.
Eingongsstøtta til samanslåtte kommunar er standardisert til 20 millionar kroner, ein sum som kan auke avhengig av talet på kommunar og innbyggjarar. I tillegg kjem reformstøtte på mellom 5 og 30 millionar, og 2 millionar kroner i hurtigløp-støtte til dei fem første kommunane.
– Støtta er ei anerkjenning av at kommunane har jobba effektivt og godt for å komme raskt i mål, og at dette gir meirverdi for andre kommunar, seier Kvandal.
For eksempel får Larvik og Lardal, som blir éin kommune, 52 millionar kroner i ferske pengar. Av desse er 25 millionar til eingongskostnader, 25 millionar i reformstøtte og 2 millionar for hurtigløp. (©NPK)
