Seks kommunar i Hallingdal samarbeider for å skape leselyst hos dei unge i sine respektive kommunar. I sommar har dei leseaksjonen Sommarbok for andre gong.
Då dei arrangerte leseaksjonen saman for første gong i fjor var det rundt 15 unge som deltok i kvar kommune.
– Vi har ein felles språk- og leseplan i Hallingdal, og aksjonen er ein del av denne, fortel bibliotekar på Gol bibliotek, Karin Bjørge, til lnk.no.
Det er biblioteka i kommunane Gol, Flå, Nes, Hol, Hemsedal og Ål som samarbeider om planen. Ål og Hemsedal har leseaksjonen for tredje gong denne sommaren.
Dei unge melder seg på aksjonen på sitt lokale bibliotek. Der får dei utdelt eit lesekort som dei fyller ut. Dei kan også skrive meldingar av bøkene dei les og levere inn til biblioteka.
Målet med sommarens leseaksjon,som varer frå 20. juni til 1. september,er klart.
– Vi ønskjer å skape leselyst og leseglede, som igjen kan føre til auka leseferdigheiter, seier bibliotekar Bjørge.
