Kvifor byter så mange elevar målform frå nynorsk til bokmål? Det er tema for doktogradoppgåva til Eli Bjørhusdal.
Nesten 40 prosent av skuleelevane som byrjar med nynorsk går over til bokmål i løpet av skuleåra. Bjørhusdal les no norske styringsdokument for å sjå korleis dette språkskiftet blir tematisert og problematisert. Så langt meiner ho dette forholdet mellom nynorsk og bokmål, og det at elevane byter målform, ikkje er eit tema eller blir vidare problematisert.
– Vi veit jo at språkskiftet er størst på Austlandet, og i områda rundt dei store byane på Vestlandet. I Sogn er språkskifte minst, det er her nynorsken er mest etablert. Det er og lite språkskifte på det rurale Sunnmøre, på Voss og i Hardanger, seier Eli Bjørhusdal til Framtida.no.
– Vi ser at den språkpolitiske vekta i opplæringsfeltet har vore på sidemål. Skriftspråkskiftet frå nynorsk til bokmål har nok ikkje vorte sett på som så politisk viktig.
