No kan du føreslå tiltak og endringar som kan gjere kvardagen enklare for næringsdrivande i heile landet.
På bloggen www.enklereregler.no inviterer Nærings- og handelsdepartementet alle til å kome med forslag til konkrete tiltak som kan redusere tida og ressursane bedriftene bruker på administrative oppgåver. Målet er at norsk næringsliv på denne måten skal kunne kutte 10 milliardar kroner i administrative kostnader innan utgangen av 2015.
– Regjeringa vil at bedriftene skal bruke mest mogleg av tida sin på å drive næringsverksemd og minst mogleg tid på administrative oppgåver for å etterleve lovar og forskrifter. Vi treng innsikt og erfaring frå næringslivet for å forenkle lovar og reglar for norske bedrifter, sa nærings- og handelsminister Trond Giske under lanseringa av bloggen.
Bloggen opna 10. oktober, og forslaga har byrja kome inn allereie. Eitt konkret går ut på å redusere talet på moms-terminar frå seks til fire i året. Det vil redusere arbeidet med moms-oppgjer med 33%, seier ein innsendar. Ein annan føreslår utbetringar i Alt-inn som gjer arbeidet med rapportering meir effektivt.
Kampanjen legg vekt på tre særskilde område: enklare reglar, enklare rapportering og betre informasjon.
