Maria Parr får Sigmund Skard-stipendet 2013.
Parr får prisen fordi ho set målgruppa si i sentrum og kompromisslaust stiller seg på barnets side. Prisen er på 25 000 kroner.
Vaffelhjarte er seld til 19 land, Tonje Glimmerdal til 14 land, og sistnemnde blir i haust sett opp på Det Norske Teateret. Vaffelhjarte har gjort suksess som fjernsynsserie på NRK, og vann den europeiske fjernsynsprisen Prix jeunesse.
– Parr skriv om kvardagshendingar som skuletimar og kjelkeaking, men tekstane hennar er aldri trivielle eller daterte, dei har noko tidlaust over seg. Gjennom å setje barnet i sentrum og gå i augehøgd med karakterane sine, klarer ho å formidle livets sorger og gleder gjennom å kompromisslaust vere på barnet si side, heiter det i grunngjevinga til juryen.
I Tonje Glimmerdal teiknar Parr portrettet av ei jente med pågangsmot, varme og klokskap, lik Lindgrens Ronja. Tonje er einaste barnet i Glimmerdal. Ei jente som beherskar livet og dalen ho lever i, sjølv om ho berre er eit barn. Det er det kompetente barnet som susar på ski og kjelke nedover lia, og som i møte med vaksne er nyfiken, direkte og har integritet. Alt er vel fram til Tonje ein dag får vite at bestevennen, gamle Gunnvald på over 70 år, har ein løyndom som ingen har fortalt henne om fordi ho berre er eit barn.
– Parr er barnets unike forsvarar, og gjennom tekstane sine viser ho barnet kvar ansvaret ligg når det er noko alvorleg som er feil, at det er dei vaksne som skal rydde opp når noko er gått gale, meiner juryen.
Sigmund Skard-stipendet går til ein forfattar som har gitt ut minst éi bok med høg litterær kvalitet dei siste fem åra. Stipendet skal medverke til å utvikle den aktuelle forfattarskapen, og stipendet er på 25 000 kroner. I juryen sit redaktør Kjersti Instefjord, forlagssjef Håkon Kolmannskog og forlagsdirektør Edmund Austigard i Samlaget
