For tredje året på rad bed no KRD nynorskkommunane om å melde seg i konkurransen om å bli Årets nynorskkommune.
– Kommunar som har eit medvite forhold til nynorsk, som ønskjer å styrke kvaliteten i språket og som sjølve brukar språket aktivt, bør søke om å få bli Årets nynorskkommune, seier kommunal- og regionalminister Liv Signe Navarsete (Sp) til LNK.
– Nynorsken er ein viktig del av identiteten vår og har ein sentral plass i den nasjonale litteraturen, seier Navarsete.
– Vi må arbeide for å oppretthalde og styrke nynorsken si rolle og sikre at det offentlege brukar språket aktivt. Vi treng kommunar som er bevisste på å legge til rette for bruk av nynorsk og vi treng politikarar som frontar nynorsken, seier statsråden vidare.
Ho peiker på at kommunane gjerne må samarbeide med det lokale næringslivet og oppmode dei til å profilere seg på nynorsk.
Prisen Årets nynorskkommune er på 100 000 kroner og har tidlegare gått til Stord (2009) og Seljord (2010). Fristen for å søke i år er 15. oktober. I juryen for Årets nynorskkommune sit representantar frå Landssamanslutninga av nynorskkommunar, Landslaget for lokalaviser og Språkrådet, medan departementet er sekretariat. Prisen vil bli delt ut i løpet av november.
