Telemarksavisa (TA) har hatt ei stilling ledig som nynorskjournalist i Vinje sidan i fjor sommar utan å få napp.
Redaktør Ove Mellingen i TA seier til journalisten.no at han er overraska over at så få har vist interesse for stillinga.
– Vinje er ei bygd som er historisk prega av nynorsk. Difor vil me ha ein nynorskjournalist i jobben.
TA lyste ut stillinga for fyrste gong sist sommar. Fem-seks melde interesse, men ingen av desse blei tilsett. Klubbleiar Dag Hagen i TA seier at det er få kvalifiserte søkjarar i lokalmiljøet, og at det er vanskeleg å få folk utanfrå til å søkje.
– Dei fleste vil vere i eit miljø der dei er kjende, seier han.
I stillingsannonsen står det ingenting om løn, og difor meiner Hagen at det er andre faktorar som spelar inn for søkjarane. (©NPK)
