– Staten har ei særs viktig rolle som språkleg føredøme, seier direktør Arnfinn Muruvik Vonen i Språkrådet.
Alder ?
53 år.
Yrke ?
Språkvitar og direktør i Språkrådet.
Brukar sommaren til ?
I slutten av juni og byrjinga av august er eg med på to av hovudtilskipingane i Språkåret: Dei nynorske festspela og markeringa av fødselsdagen til Ivar Aasen. I juli blir det mykje roleg hytteliv i Vrådal i Telemark. Blir vêret bra, blir det nok både soling og bading i tillegg til å nyte dialekten på staden.
Kvifor er språk så viktig?
Fordi språk er det fremste verktøyet vi har til å tenkje og til å vere saman med andre menneske. Språkvala våre ber bod om kven vi er og vil vere, og gjennom språket uttrykkjer vi kjærleiken vår, makta vår og – nokre gonger – avmakta vår. Og så er det både morosamt og innsiktsgjevande å gå på jakt etter dei råkande orda og dei fine grammatiske mønstera i språket.
På kva område kunne nynorsken vore meir synleg?
Først og fremst kunne nynorsken vore meir synleg der han skulle vore det etter lova – i statlege tekstar. Staten har ei særs viktig rolle som språkleg føredøme. Om fleire statsorgan hadde følgt målbruksreglane, trur eg vi ville sett meir nynorsk i andre samanhengar òg, og fleire språkbrukarar ville lagt frå seg nokre fordommar om nynorsk. Nokre bedrifter har valt å profilere seg som nynorskbrukarar, det er det rom for at mange fleire gjer.
Kva trur du skjer med nynorsken etter stortingsvalet til hausten?
Nynorsk er eit robust skriftspråk som vil leve godt i mange år enno, og det er brei politisk semje om å ta vare på språkarven vår og dyrke båe dei to jamstilte norske målformene. Språkrådet arbeider med å setje den heilskaplege norske språkpolitikken ut i livet, og det vil vi gjere etter valet òg.
Kvifor nynorsk ?
Fordi nynorsk finst og er det føretrekte skriftspråket til ein halv million menneske her i landet. Og så er nynorsken så fin attpåtil!
