Absurd og uforståeleg at ikkje journalistar får bruke si eiga målform, seier Ingvild Tandstad frå Østlandssendingen.Ho fekk Alf Helleviks mediemålpris i år.
Namn: Ingvill Tandstad
Alder: 33
Jobbar som: Journalist og programleiar i NRK Østlandssendingen
Bruker sommaren til: Å ha det mest muleg godt, moro og fredeleg saman med den vesle familien min! Heim til Sunnmøre, der vi besøker far og mor i Ålesund og Sykkylven. Så ei vekes tid med fjell og vin på hytta i Rondane, og til slutt ein liten tur til Strømstad. Elles blir det å halde Oslo og Akershus sine innbyggarar oppdaterte på nyheitsfronten, via TV og radio.
Bruker du nynorsk i blogg, Twitter, Facebook og i andre sosiale nettverk: Ja, eg prøvar å vere konsekvent, men det hender seg, når stemninga er god og folka eg snakkar med legg opp til det, at dialekten tek overhand.
På kva område kunne nynorsken vore meir synleg: I riksavisene og i populærkulturen.
Bør aviser som ikkje tillet båe målformer som redaksjonsspråk få pressestøtte: Eg er i utgangspunktet ikkje for tvang, men samstundes synast eg verkeleg at det er heilt absurd at journalistar ikkje får bruke si eiga målform. Eg ser eigentleg ikkje nokon gode argument for å nekte medarbeidarar dette. Frå min ståstad verker det veldig konservativt, ein smule fordomsfylt og ganske uforståeleg.
Har det noko å bety for deg om bøker og aviser er på nynorsk og/eller bokmål: Nei, min bruk av media og litteratur blir ikkje styrt av målform. Men når det er sagt, så blir eg veldig glad dei gongane eg kan nyte meg gjennom eit bra skjønnlitterært verk på nynorsk. Det er nesten det beste som finst!
Kvifor nynorsk: Fordi eg er oppvaksen med nynorsk, og det er det som ligg nærmast opp til mitt eige talemål.
