Forfattaren Rønnaug Kleiva frå Ørsta blir festspeldiktar under Dei nynorske festspela 2010. Ho er den syttande forfattaren som får denne æra.
Dei nynorske festspela 2010 blir arrangerte i Ørsta og Volda frå onsdag 23. juni til søndag 27. juni, med Ivar Aasen-tunet som hovudarena.
Kleiva debuterte i 1985 og kan dermed feire 25-årsjubileum som forfattar neste år. Ho har gitt ut 22 bøker i mange sjangrar og er omsett til åtte språk, mellom anna serbisk, gresk og russisk. I september kjem ho med ein ny ungdomsroman, går det fram av ei pressemelding frå Det Norske Samlaget.
Sjangerblanding
– Eg liker å skrive i ulike sjangrar. Eg hadde ikkje orka å skrive berre same typen bøker heile tida. Dikt skulle eg gjerne ha skrive meir av, men i staden puttar eg poesien inn i prosaen, seier Rønnaug Kleiva, som gler seg stort til å vere festspeldiktar.
Kva festspeldiktaren skal gjere under Festspela neste år, blir fastlagt utover hausten og vinteren.
– Publikum skal nok få både det dei ventar og noko som overraskar. Ved at så ulike forfattarar er festspeldiktarar, blir Festspela ganske ulike frå år til år, seier programansvarleg Åshild Widerøe.
– Forfattarskapen til Rønnaug Kleiva spenner så vidt at vi får noko å bryne oss på når vi no skal forme festspelprogrammet, seier Widerøe, som lovar flunkande nye tekstar frå festspeldiktaren.
Prisvinnar
Kleiva har fått mange strålande kritikkar for bøkene sine. Ho skaper stilrein og konsekvent litteratur, skriv litteraturkritikaren Odd W. Surén i ein artikkel om Kleiva på det nye nettleksikonet Allkunne.
– Ho grip ikkje retusjerande inn i hendingane ho skildrar, skriv Surén, «men lèt dei utvikle seg organisk og naturleg, utan omsyn til kor mykje av personane dei avslører, og kor kompromitterande dette er for dei».
Kleiva debuterte med diktsamlinga Animasjon i 1985, og har til no gitt ut 22 bøker for born, unge og vaksne. Forfattarskapen spenner frå dikt og prosalyrikk til barnebøker og ungdomsromanar og vidare til romanar, noveller og skodespel. Nesten alle bøkene er gitt ut på Det Norske Samlaget.
Ho har fått mange prisar for bøkene sine, mellom anna både Kritikarprisen og Kultur- og kyrkjedepartements pris for «Ikkje gløym å klappe katten» som beste barne- og ungdomsbok i 1997. (©NPK)
