LNK feirar sommaren med å senke skuldrane og la aktuelle røyster få sleppe til i ein liten sommarsnakk kvar måndag. Først ute er Agnes Ravatn.
Namn: Agnes Ravatn
Alder: 26
Jobbar som: Forfattar, og journalist i Dag og Tid.
Bruker sommaren til: Lage avis, og i heile august skal eg vere i London.
Bruker du nynorsk i blogg, Twitter, Facebook og i andre sosiale nettverk: Eg brukar nynorsk i alle skriftlege samanhengar, men i sosiale nett-nettverk held eg meg stort sett taus, og overvåkar i staden andre.
På kva område kunne nynorsken vore meir synleg: Eg ønskjer meg ei nynorsk Frid Ingulstad og eit nynorsk Se & Hør. Kvifor skal bokmålet få ha monopol på det tarvelege?
Bør aviser som ikkje tillet båe målformer som redaksjonsspråk få pressestøtte: Dersom eg svarer nei her, fjernar eg vel samstundes Dag og Tid si pressestøtte? Men svaret er nei.
Har det noko å bety for deg om bøker og aviser er på nynorsk og/eller bokmål: Så lenge språket er godt, til sitt bruk, og avsendaren får fram det han eller ho vil ha fram, er det det samme for meg.
Kvifor nynorsk: Einar Økland har skrive at slik fulle nordmenn trur dei kan snakke engelsk, trur bokmålsfolk dei kan skrive nynorsk. I den samanhengen er eg edru: eg veit eg ikkje kan skrive godt bokmål.
