LNK oppmodar fleire kommunar å vedta språkbruksplanar. No er nye malar utarbeidd – også malar for samanslegne kommunar som blir språknøytrale.
Ein tredjedel av LNK sine medlemskommunar har no vedteke eigne språkbruksplanar, eller målbruksplanar som dei òg blir kalla. Dei fleste planane byggjer på ein mal som LNK har sendt ut.
– Språkbruksplanar er viktige fordi dei set språkspørsmål på dagsorden i kommunane og fordi dei ofte plasserer ansvaret for kommunespråket hos ein etat eller avdeling. Planane fører til sikrare språkbruk hos tilsette og til ei meir medviten haldning i språkspørsmål generelt, seier dagleg leiar i LNK, Vidar Høviskeland.
Nye planar
Jan Olav Fretland og Jostein Avdem Fretland har no utarbeidd språkplanar for både nynorskkommunar og reelt tospråklege kommunar.
– Me har delt det inn i to, med ein politisk del med konkrete reglar for korleis nynorsken skal takast vare. Det gjeld til dømes at det skal rapporterast til kommunestyret korleis det går med nynorsken i skulane, kva språkarbeid som er gjort, kva som har gått bra og ikkje så bra.
For dei samanslegne språknøytrale kommunane har Fretland & Fretland laga ein språkplan som prøver å bidra kommunane til å vera mest mogleg språknøytrale og ta vare på nynorsken.
– Ei samanslåing er eit gyllent høve til å få på plass ein språkbruksplan, seier Jan Olav Fretland, som til dagleg jobbar som dosent ved Høgskulen i Sogn og Fjordane.
Nordmøre Mållag har støtta utarbeidinga av språkplanar for samanslegne, språknøytrale kommunar.
Bidrar til samla trykk
Jan Olav Fretland meiner språkbruksplanar kan vera veldig viktige.
– Dei kan vera med på å skapa eit samla trykk mot Utdanningsdirektoratet, programvareleverandørar og sløvheit mellom dei som ikkje kan nynorsk i kommunane. Til slutt blir det eit marknadstrykk som ein lenge har snakka om.
Malane finn du under, saman med eit notat om tospråklege kommunar:
Språkbruksplan for språkdelt og samanslegen kommune
Språkbruksplan for nynorsk, samanslegen kommune
Alternativ for ikkje samanslegne kommunar
Retningslinjer for bruk av nynorsk og bokmål i X samanslegen kommune
