Kulturarbeidar Jens Brekke i Vik meiner det nye ruteheftet i Sogn og Fjordane er ei salig blanding av bokmål og nynorsk.
– Språket er det tydelegvis ingen som har brydd seg om. Det er for sløvt altså. Det byrjar flott med «Kjære kollektivbrukarar», deretter er det fullt med feil utover i heftet. Det er så vanvittig gale, seier Brekke til NRK Sogn og Fjordane.
Han har oppdaga mange feil i det nye ruteheftet som fylkeskommunen har sendt ut.
– Under båtruta til Bergen er det ei setning på nynorsk, medan den neste er på bokmål: «Ved høgtider og ferier kan det være begrenset kapasitet på medbrakt mengde gods». Ein stad står det «væratterhald», slår Brekke fast.
Han meiner fylkeskommunen burde kvalitetssikre språket sitt betre. Noko fylkesdirektør for samferdsle, Velaug Veum, seier seg samd i.
– Jens Brekke har heilt rett, dette er ikkje bra, seier ho til NRK.
Bidraga i ruteheftet er sendt frå dei ulike transportselskapa til NHO Transport som igjen har sendt dei vidare til fylkeskommunen. No lovar Veum at ein skal skjerpe seg til neste år.
