Håvard B. Øvregård i Noregs Mållag er skuffa over at nynorsk i skulen fekk lite merksemd i statsbudsjettet.
– Noregs Mållag ventar at Kunnskapsdepartementet tek eit krafttak for nynorsken i skulen. Ei betre nynorskundervisning i grunnskulen og vidaregåande skule krev klarare prioritering frå Kunnskapsdepartementet, seier Håvard B. Øvregård i ei pressemelding.
Han meiner utfordringa med å styrke nynorsken i skulen knapt er nemnt i budsjettdokumentet.
Øvregård legg vekt på at det no er viktig at Kunnskapsdepartementet brukar ressursane sine på ein slik måte at kommunane gir elevane god undervisning på nynorsk, læreverk på nynorsk og oppdaterte og kompetente lærarar. I tillegg meiner han det er viktig at departementet stiller krav til korleis fylkeskommunane kjøper inn bøker til vidaregåande skule.
– Noregs Mållag meiner det er avgjerande at Kunnskapsdepartementet, allereie i statsbudsjettet, gjer det heilt klart at det ikkje vert betalt ut midlar til ulovlege læremiddel. Dette vil seie læremiddel som berre er tilgjengeleg på bokmål, seier Håvard B. Øvregård til nm.no.
Noregs Mållag har sjølv motteke i overkant av 3,6 millionar kroner i støtte frå Kulturdepartementet for å styrke nynorsk skriftkultur.
